Dalawang ginang na ang negosyo ay ang pagtutulak ng droga ang nalambat ng mga awtoridad sa isang buy-bust operation kamakalawa sa Malabon City.
Kinilala ni Sr. Insp. Arnel Dimalanta, hepe ng Station Anti-Illegal Drugs-Special Operation Task Group (SAID-SOTG) ang dala wang naarestong suspek na sina Adela Lozarita-Boglosa, 45, at Aurora Lopez, 42, kapwa ng Labahita St., Brgy. Longos, Dagat-Dagatan, Malabon City.
Nabatid na dakong alas-5:30 ng hapon nang maaresto ang mga suspek sa kahabaan ng Labahita St. malapit sa kanilang bahay sa nasabing barangay.
Ayon sa ulat ng pulisya, ilang residente ang nagbigay ng impormasyon tungkol sa talamak na bentahan ng bawal ng droga sa kanilang lugar ng dalawang suspek.
Isang buy-bust operation ang isinagawa kung saan unang nadakma si Lopez habang inaabot ang plastic sachet ng shabu sa mga pulis na nagpanggap na buyer. Itinuro naman nito si Boglosa na siya niyang pinagkukunan ng shabu.
Inihahanda na ang kaso laban sa dalawang ginang. (Lordeth Bonilla)