British idedeport

Nakatakdang ipatapon ng Bureau of Immigration ang isang British pedophile na matagal nang pinaghahanap sa kanyang bansa. Kinilala ni BI Commissioner Marcelino Libanan ang pugante na si Kriss McCord na naunang nasentensyahan ng isang korte sa kanyang bansa ng siyam na taong pagka­bilanggo dahil sa tatlong counts ng rape at apat na counts ng indecent assault. Inilagay din sa immigration blacklist ang naturang dayuhan. Naaresto si McCord sa Llanera, Nueva Ecija noong December 8, 2006. (Butch Quejada)

Binata nagnakaw ng bigas

Bilangguan ang kinabagsakan ng isang binata habang nakatakas naman ang dalawa niyang kasama makaraang nakawan nila ng bigas at sardinas ang kanilang kapitbahay sa Malabon City kamakalawa ng hapon. Nakilala ang suspek na si Richard Paloma, 26, ng Gulayan, Catmon ng lungsod. Hindi pa mabatid ang pagkakakilanlan sa kanyang mga kasabwat. Sinabi ng biktimang si Manuel Mondejar, 57, na alas-5:30 ng hapon nang makita niya ang mga suspek na tinangay ang kanyang apat na kilo ng bigas, tatlong lata ng sardinas at ilang mga kasangkapan. (Lordeth Bonilla)

Aksidenteng naputukan

Isang 53-anyos na negosyanteng si Ramon Go ng New Manila, Quezon City ang namatay nang aksidenteng maputukan ng kanyang baril na inilapag niya sa ibabaw ng isang washing machine habang pinupulot niya ang nalaglag na susi ng kanyang kotse sa garahe ng isa niyang kaibigan sa Barrio San Jose, Caloocan City kamakalawa ng gabi. (Lordeth Bonilla)