Muling pinagharian ng tensiyon ang Glo rietta Mall makaraang umusok ang bahagi ng gusali dahilan upang mag-panic at mag-unahang magpanakbuhan palabas ang mga mall shoppers sa pangambang may kinalaman sa bomba ang nasabing insidente, kamakalawa ng hapon sa Makati City.
Sa panayam kay P/S Supt. Gilbert Cruz, hepe ng Makati City Police, pasado alas-2 ng hapon kahapon nang magsimulang umusok ang bahagi ng gusali ng mall.
Umaabot naman sa halos 20 minutos ang pagbuga ng nasabing usok sa gusali bago pa man ito naapula kung saan dahil sa nasabing insidente ay muling binalot ng tensiyon ang mga shoppers rito na nag-unahang magpanakbuhan palabas ng mall.
Agad namang rumesponde ang mga kagawad ng Makati City Police sa lugar at nang siyasatin ay sanhi lamang ng nag-overheat na cooling system ng mall ang naging ugat ng usok na unang inakala ng mamimili na may kinalaman naman sa anumang uri ng bomba.
Wala namang iniulat na nasaktan sa nasabing insidente. (Rose Tamayo-Tesoro)