Kamatayan ang na ging sukli ng pagti-trip ng isang lalaki na mambato ng mga kabahayan makaraang saksakin siya ng isang residente na muntik nang tamaan ng bato habang natutulog kahapon ng madaling- araw sa Quezon City.
Nakilala ang nasawi na si Pedro Macaranas, helper, tubong-Pangasinan at naninirahan sa Ussaffe St., Brgy. Holy Spirit, ng naturang lungsod. Nakatakas naman at pinaghahanap ngayon ang suspek na nakilala lamang sa alyas na Abet.
Ayon sa ulat, naganap ang insidente dakong alas-12:30 ng madaling-araw sa tapat ng SBI Auto Supply sa Blk. 1 Lot 6 Commonwealth Avenue, Brgy. Holy Spirit. Nabatid sa mga saksi na nambabato ng mga kabahayan sa naturang lugar ang biktimang si Macaranas kasama ang dalawa pang lalaki. Dito umano tinamaan ang bahay ng natutulog na suspek. Galit na lumabas at kinompronta ang biktima. Nauwi ang pagtatalo sa suntukan hanggang sa maglabas ng patalim ang suspek at ilang beses na inundayan ng saksak si Macaranas bago ito mabilis na tumakas. Hindi na rin naman mahagilap ng mga awtoridad ang dalawa pang kasamahan ng biktima sa pambabato. (Danilo Garcia)