Pamangkin ni Biazon tinutukan ng baril dahil sa parking

Dahil lamang sa pag-uuna­han sa pwesto sa paradahan ng sasakyan, isang negosyante ang nahaharap ngayon sa kasong grave threat matapos tutukan nito ng baril ang pa­mangkin ni Sen. Rodolfo Bia­zon, kamakalawa ng gabi sa Muntinlupa City.

Batay sa imbestigasyon, si Ferdinand Satuito, 62,  ay naha­harap sa kasong grave threat matapos sampahan ng kauku­lang reklamo ng pamangkin ni Sen. Biazon na kinilalang si Jose Solano, 31, na isa rin sa staff ng senador. Batay sa ulat ng pulisya, naganap ang na­sabing insi­dente kamakalawa ng gabi sa parking lot ng South Tower Building, Madrigal Busi­ness Center, Muntinlupa City.

Sa inisyal na imbestigasyon, kapwa naghihintay sina  Solano at Satuito na may mabakan­teng parking space sa naturang lugar hanggang sa umalis ang isang kotseng nakaparada.

Ipaparada na ni Solano ang kanyang kotse sa nabakanteng lugar nang sunud-sunod na busi­nahan at pinailawan ng head­ lights ng suspect ang una. Hindi pa umano nakuntento, bumaba pa ang suspect sa kan­yang kotse at binunot ang ka­libre .45 na baril nito at itinutok sa biktima.

Agad namang humingi ng tulong sa pulis ang biktima at na­kuha sa loob ng kotse ng suspect ang nasabing baril na naglalaman ng anim na bala sa magazine.

Sa kasalukuyan inaalam pa ng awtoridad kung may kauku­lang lisensya at permit ang na­kumpiskang baril sa suspect. (Rose Tamayo-Tesoro)