Buntis binaril sa holdap

Sugatan ang isang 27-anyos na buntis matapos ma­baril sa tiyan ng isang holdaper na nagresulta rin sa pag­­kasawi ng kanyang sanggol sa tiyan, sa Binondo, Maynila, sa ulat kahapon.

Nakilala ang biktima na si Sherly Francisco, negos­yante, ng Carmen Planas, Binondo, Manila, na agad   isi­nailalim sa caesarian operation sa Gat Andres Hos­pital. Bagamat nasa stable na siyang kondisyon hindi naman naisalba ang buhay ng sanggol sa kanyang sina­pupunan. Tinutugis naman ang suspect  na inila­rawan sa pagitan ng 30-35 anyos,may taas na 5’5’’, katamta­man ang pangangatawan, nakasuot ng bull cap na asul, bigotilyo at armado ng kalibre .22 na tumakas matapos ang insidente.

Naganap ang insidente dakong ala-1:35 ng hapon, kamakalawa sa loob ng Stall 4 and 5, Ground Floor, Pa­sillo A, Zosima Bldg., sa may  panulukan ng Carmen Planas at C.M. Recto Ave., Binondo.

Nabatid na nagkunwaring may bibilhin ang suspect at nang matunugang nag-iisa ang biktima ay naglabas ng baril at nagdeklara ng holdap. Pwersahan din uma­nong kinakalas nito ang belt bag ng biktima na nasa bey­wang nito na may lamang P15-libong benta subalit pumalag ang ginang kaya magkakasunod na pinapu­tukan ng suspect at tagumpay na natangay ang salapi. Du­guang humandusay ang biktima, habang ang suspect ay tumakas sa direksiyon umano ng Sto. Cristo, sa Binondo.

Sa pagsisiyasat, apat na bala ng kalibre .22 na baril ang tumagos sa katawan ng biktima. (Ludy Bermudo)