PUP pumalag sa ‘You Tube’ version ng gang rape

Mariing pinabulaanan ng pamunuan ng Poly­technic University of the Philippines (PUP) ang ‘YouTube’ video sa internet na sinasabing eksena sa naganap na ‘gang rape’ na kinasasangkutan ng mga estudyante umano ng eskwelahan.

Sinabi ni Dr. Dante Gue­varra, Presidente ng PUP, na ang may kagaga­wan ng pag-upload ng video ay nais lamang sirain ang reputasyon ng eskwe­lahan kaya sinadya ang pagpapakalat ng video, sa kabila ng ‘edited’ at mga ‘still photos’ umano ito upang magmukhang naku­nan ng video ang sinasa­bing ‘gang rape’.

“It is very obvious that the person/s who edited and uploaded the still photos using “movie­maker” does, do not just want to discredit the perso­nality of the victim but the good name of the univer­sity,” ani Guevarra.

Ani Guevarra, inatasan niya  ang PUP-College of Com­puter Management and Information Techno­logy (PUP-CCMIT) at In­formation and Communi­ca­tion Techonology Center (ICTC) na aksiyunan upang pigilan ang pagpo-post o  uploading ng na­sabing video.

Kasabay nito, umapela din si Guevarra sa mga mamamahayag na huwag nang i-sensationalize ang isyu lalo na sa aspetong sekswal .

Tiniyak ni Guevarra na sa isang linggo ay ilalabas nila ang resulta ng kanilang sariling imbestigasyon hinggil sa isyu ng gang rape ng binuo nilang Fact-Finding committee.

Una nang inakusahan ng isang 16-anyos na   freshman student ng PUP ang  mga kaklase nito na naghalinhinang gumahasa sa kanya sa loob ng isang silid ng campus, pinagamit siya ng iligal na droga, isinakay sa van at dinala sa isang bahay at muling ginahasa. Bukod pa rito ay ang akusasyong kinunan ng video ang isinasa­gawang rape ng mga res­ponsable umano sa pang­gagahasa.