Sales agent tinodas ng bayaw

Dahilan sa matandang alitan, isang sales agent ang namatay samantalang suga­tan naman ang anak nito ma­tapos silang pagsasaksakin ng 70-anyos na bayaw ng una kahapon ng umaga sa Sta. Ana Maynila.

Namatay habang ginaga­mot sa Lourdes Hospital sanhi ng mga saksak sa katawan ang biktimang si Armando Balbon, 59, ng 2269 G. Te­jeron St., Sta. Ana   ng nasa­bing lungsod habang kasalu­kuyan pa ring ginagamot dito ang anak nito na si Alexan­der, 35, isa ring sales agent.

Patuloy namang pinag­ha­hanap ng mga awtoridad ang suspek na si Arturo Cabal, bayaw ni Armando na mabilis na tumakas matapos ang krimen.

Sa ulat ng pulisya,  dakong alas-11:15 ng umaga nang na­­ganap ang insidente sa eski­ nita sa Interior Alley sa tabi ng San Lorenzo Ruiz Chapel sa G. Tejeron St., Sta. Ana.

Bago umano maganap ang insidente ay kasalu­ku­yang naglalakad  ang mag-ama sa naturang lugar nang lapi­tan sila ng suspek at walang sabi-sabing nilapitan si Balbon at pinagsasaksak ito habang sinisigawan nito na “Sinungaling ka”.

Tinangka namang tulu­ngan ni Alexander ang ama subalit siya naman ang bina­lingan at sinaksak ng suspek subalit hindi nito napuruhan dahil nasalag nito ang ilang saksak gamit ang isang upu­ang plastik.

Lumalabas sa imbestigas­yon ng pulisya na matagal nang may awayan ang da­lawa na posibleng motibo sa kri­men. (Gemma Amargo-Garcia)