Sekyu kinatay ng kainuman

Kamatayan ang idinulot ng umano’y pagiging palamura ng isang 39-anyos na security guard makaraang pagtatagain  ng kanyang kainuman na mi­nura ng una, kamakalawa ng gabi sa Caloocan City.

Hindi na umabot pa ng bu­hay sa pagamutan  si Norberto dela Peña ng #12 A. Santol St., Quezon City bunga ng tinamong mga taga sa ulo at iba pang parte ng  kanyang katawan.

Patuloy naman ang isinasa­ga­wang pagtugis ng mga ele­mento ng Caloocan-PNP laban sa hindi nakilalang suspect na mabilis na tumakas matapos ang nasabing insidente.

Ayon sa ulat, dakong alas-8:30 ng gabi nang mangyari ang nasabing krimen sa Blk. 4, East Libis, Brgy. 160, Baesa, Calo­ocan City.  Bago umano ang in­si­dente ay unang nakipag-inu­man ang biktima sa  suspect at biglang nagkaroon umano ng diskusyon sa pagitan ng mga ito dahil sa umano’y pagiging pa­lamura ng una.

Sinabihan pa umano ng sus­pect ang biktima na tigilan ang pag­bibitiw ng mga maa­ang­hang na pananalita subalit hindi ito pinansin ng huli dahilan upang kunin ng una ang katabing jungle bolo at pinag-uundayan ng taga sa iba’t ibang bahagi ng katawan ang huli.

Matapos ang insidente ay mabilis na tumakas ang sus­pect, habang isinugod naman ang biktima ng mga barangay tanod sa pamumuno ni ka­gawad Florentino Timbol sa pagamutan, subalit sa daan pa lamang ay binawian na ito ng buhay. (Rose Tamayo-Tesoro)