2 holdaper dedo sa shootout

Patay ang dalawa sa  walong holdaper na tumangay sa P100-libong  cash ng isang negosyanteng Tsinoy, sa Binondo, Maynila kahapon ng umaga.

Nakilala ang mga nasawing suspect na sina Rodolfo Guibao, 33, at Porfirio Aguilan matapos na makipag­palitan ng putok sa mga kagawad ng pulisya.

Nagsasagawa pa ng follow-up operation ang MPD laban sa mga kasamahan ng  napatay na mga suspek na sinasabing nakatakas sakay ng tatlong motorsiklo.

Batay sa ulat, dakong alas-10:30 ng umaga nang maganap ang insidente sa may panulukan ng Elcano at Asuncion Sts., Tondo habang ang   biktimang si Mariano Go, 49, may-asawa, negosyante ay patungo sa Allied Bank-Sto. Cristo Branch,  na may bitbit na plastic bag kung saan nakasilid ang nasabing salapi nang biglang nilapitan ng mga suspek at nagdeklara ng holdap habang nakatutok ang mga baril.

Natiyempuhan umano ito ng mga nagpapatrulyang tauhan ng pulisya gayunman nang mapansin ng mga suspek ang papalapit na mga operatiba ay bigla silang pinaputukan na nauwi sa engkwentro hanggang sa tumumba ang dalawa sa mga ito. Bigo ang pulisya na marekober ang salapi na hinihinalang bitbit ng mga nakatakas na mga suspek. Narekober sa dalawang suspek ang isang kalibre 38, Colt 45, basyo ng bala. (Ludy Bermudo)