Obrero inadobe sa videoke

Patay agad ang isang construction worker ma­tapos na hatawin ito ng adobe sa ulo ng isa sa tat­long lalaking kanyang naka­away sa loob ng isang videoke bar, dahil lamang sa pag-aagawan sa mikro­pono at sa tangkang pag­kanta nito ng kanyang pa­boritong awitin, kahapon ng madaling-araw sa Las Piñas City.

Wala ng buhay nang idating  sa Las Piñas Dis­trict Hospital ang biktimang si Danilo Eusebio, 49.

Agad naman nadakip   ang mga suspect na sina Dexter Manlangit, 28; at Dionisio Espina, 35, ng Emi Reyes Compound, Zapote, Las Piñas, habang nagawa namang  makatakas ng ka­sa­mahan nito na kinilala lamang sa alyas na Jun. Dakong alas-12:30 ng madaling-araw nang mang­yari ang nasabing insidente sa loob mismo ng  isang vi­deoke bar na nasa hara­pan ng Neltex Factory, Za­po­te-Ala­bang Road, Las Piñas.  

Nabatid na kasama umano ng biktima ang kap­wa obrero na si Ely Miras ng #29 ng Doña Cristita Subd., Pam­plona I at da­lawa pang kaibigan nang magtungo sa nasabing bar.

Dinatnan umano ng bik­tima ang grupo ng  sus­pect na umiinom at nag-ka­kantahan din sa naturang videoke bar . Nag-request ng paboritong awitin ang biktima, subalit nang ka­kantahin na ang hiniling na awitin ay tumanggi umano ang grupo ng mga una na ibigay ang mikropono hang­gang sa magkaroon ng  mainitang pagtatalo sa pagitan ng mga ito.

Tinangka pa umanong umawat ng mga waitress sa naturang videoke bar subalit humantong na sa kaguluhan hanggang sa pagpapaluin ng kanilang dalang adobe ng isa sa mga suspect ang biktima na duguang nahandusay. (Rose Tamayo-Tesoro)