Nasawi ang isang construction worker makaraang makuryente habang nagkakabit sa fiber glass insulation sa kisame ng ginagawang gusali ng GMA television network sa Quezon City.
Dead-on-arrival sa East Avenue Medical Center (EAMC) sanhi ng third degree burn sa buong katawan ang biktima na nakilalang si Roberto Malagayo, 38, ng Cainta, Rizal.
Sa ulat ng Quezon City Police District-Station 10 naganap ang insidente sa kisame ng apat na palapag ng ginagawang gusali ng naturang television station.
Bago ito, nabatid na nagkakabit ng fiber glass insulation ang biktima sa kisame na nasa ika-apat na palapag ng naturang gusali.
Ayon sa kasamahan ng biktima na nakilala lamang na alyas Tano, may ginagawa rin siya sa kisame nang biglang sumigaw si Malagayo.
Nang puntahan niya ang kinaroroonan ni Malagayo, nakita niya itong nangingisay at halos may kuryente pang gumagapang sa katawan nito.
Bago nasaklolohan ay pinatay muna ni Tano ang main switch ng kuryente bago naisugod ang biktima sa naturang ospital ngunit idineklarang patay na nang dalhin sa pagamutan sa pamamagitan ni Dr. Rogelio Varela. (Angie dela Cruz)