Nanggulpi, nagnakaw sa estudyante, timbog

Matapos ang halos limang buwang pagtatago sa batas, nadakip na rin  ng mga tauhan ng  Quezon City Police District-Warrant Section ang isang negosyante na  umano’y nambugbog at nagnakaw ng pera at mga kaga­mitan ng biktimang si Louie Albert Serrano, nursing student.

Agad din namang nakapaglagak ng piyansang P30,000 ang akusadong si  Aron James Lao , 28, ng  #7 Robert St., Pleasant View Subdivision, Tandang Sora kay  Quezon City RTC Judge  Charito Gonzales branch 80 para sa kasong theft.

Batay sa rekord ng warrant section, nahuli dakong ala-1 ng tanghali si Lao sa kahabaan ng Banlat St. ng mga tauhan ng  mobile patrol matapos na  may makakita dito sa isang car wash station. Agad na itinuro ang aku­sado kay Serrano na agad namang humingi ng tulong sa dumaang mobile patrol. Nag-ugat ang kaso ni Lao nang mapagtripan at bug­bugin nito  si Serrano at dalawang kaibigan  sa Tomas Morato noong Enero 10.

Nakasakay siya sa kanyang kotse  na Honda na may plakang UBE-583 kasama  sina Michael  at Miguel Castro sa tapat ng  Decades Bar nang biglang harangin ng  akusado na sakay naman ng isang Honda SIR na may plakang  VAJ-168 sa likod at plakang  8 naman sa harap at may blinker. Bigla na lamang  binasag  ni Lao at iba pang kasama nito ang sasakyan ni Serrano at pinagbu­bugbog. Nawala  ang pera at ilang personal na gamit ni Serrano sa sasakyan. Si Lao ay pansamantalang nakala­laya matapos mag­lagak ng piyansa.  Pero tuloy ang kaso rito na tinaguri­ang “Siga sa Morato”. (Doris Franche)