Iskuwater sa Karingal kusa nang nagsialis

Kusang nagsilisan na ang libu-libong iskuwater sa loob ng Camp Karingal na himpilan ng Quezon City Police District ma­ta­pos na  kusa nilang bak­lasin ang kanilang mga bahay sa higit dalawang ektaryang lupain.

Sinabi ni P/Sr. Supt. Elmo San Diego, Deputy Director for Administra­tion, na wala nang puma­lag sa mga iskuwater nang umpisahan na nilang sirain ang mga bahay at nakiusap na sila na lamang ang mag­gigiba upang hindi masira ang kanilang mga gamit at mapakinabangan pa ang mga kahoy at yero.

Kabilang sa mga ba­hay na winasak ang isang dalawang palapag na tahanan na yari sa kong­kreto na pag-aari ng isang Col. Paguinto, na­ka­talaga rin sa QCPD.  Ayon sa isang tauhan ng QCPD, nakarehistro si Paguinto bilang residente ng San Juan City.

Kasama rin sa wina­sak ang bahay na nagsil­bing quarters ni Supt. Leslie Castillo, ang Camp Commander ng Camp Karingal.

Kinumpirma naman ni San Diego na hindi maka­katanggap ng relokasyon ang mga residente dahil sa karamihan sa mga ito ay mga nagrerenta na lamang sa mga tunay na may-ari ng bahay kaya lumalabas na puro “pro­fes­sional squatters” na ang mga ito.

Binigyan naman ng QCPD ng tig-P3,000 ang mga naninirahang pa­milya kada isang bahay, mga groceries at libreng transportasyon kung saan nila nais dal­hin ang mga gamit sa loob lamang ng Metro Manila. (Danilo Garcia)