Halos lumuwa ang bituka ng isang 40-anyos na mister nang mapagtripan itong saksakin at pagpapaluin ng dalawang hindi nakikilalang adik sa droga kahapon ng madaling-araw sa Navotas City.
Kritikal at kasalukuyang inoobserbahan ngayon sa Tondo Medical Center ang biktimang si Gilbert Delovino ng Block 26, Lot 39, Phase 2, Area 1 ng nabanggit na lungsod habang tinutugis naman ng pulisya ang dalawang suspek, na kinilala lamang sa mga alyas na “Joel” at “Jonathan”, na mga residente ng Phase 2, Area 1.
Sa ulat ni PO2 Randel Adora, may hawak ng kaso, dakong alas-3:00 ng madaling-araw nang maganap ang insidente malapit sa bahay ng biktima sa nabanggit na lugar.
Habang naglalakad pauwi ang biktima kasama ang kanyang kaibigan at kapitbahay na si Joel Reyes, 38, mula sa lamayan ng patay malapit sa kanilang lugar.
Ayon kay Reyes, nakasalubong nila ang dalawang suspek na pawang nanlilisik ang mga mata sanhi ng sobrang pagkabangag sa droga at ilang hakbang pa lang silang nakalalagpas ay agad na inatake ng saksak at hatawin ng bote ng beer sa ulo ng mga suspek ang biktima lamang na si Delovino. (Lordeth Bonilla)