Pinatay sa gulpi ang isang sabungero ng kapwa nito sabungero matapos magtalo sa kanilang mga manok kamakalawa sa Ca loocan City.
Namatay habang ginagamot sa Manila Central University (MCU) Hospital sanhi ng tinamong pinsala sa kanyang katawan ang biktimang si Leonardo Soliven, 46, may-asawa ng #55 Malolos St., Bagong Barrio, nabanggit na lungsod.
Tinutugis naman ng pulisya ang suspek na si Leonardo Leoncio, alyas Nonong, kilalang maton at residente ng Balagtas St., Bagong Barrio.
Sa ulat ng pulisya, dakong alas-8:50 ng gabi nang maganap ang insidente sa kahabaan ng Gen. Mascarado St., Bagong Barrio, Caloocan City. Nabatid na unang nakitang nagtatalo ang biktima at suspek hinggil sa kani-kanilang mga panabong na manok.
Ang pagtatalo ay nauwi na sa panggugulpi ng suspek sa biktima na hindi na nakaganti pa. Tinigil lamang ng suspek ang panggugulpi nang maramdaman niyang hindi na humihinga ang biktima.
Mabilis na tumakas ang suspek at ang biktima naman ay isinugod sa pagamutan ng ilang mga residente doon. (Lordeth Bonilla)