Inaresto ng mga kagawad ng Manila Police District ang isang pulis-Mandaluyong matapos na umano’y gahasain nito ang isang 17-anyos na dalagita sa Sta. Ana, Maynila, iniulat kahapon.
Ang suspek na nakilalang si PO2 Avelino Baluyot, 40, ng Tenement Bldg., Punta, Sta. Ana, nakatalaga sa Eastern Police District-Mobile Patrol Unit ay isinailalim sa inquest proceeding matapos madakip.
Batay sa ulat, ang insidente ay naganap sa itaas ng nasabing tenement dakong alas-4 ng hapon noong March 14. Sa imbestigasyon, lumalabas na naglayas ang biktimang si Thessa (di-tunay na pangalan), ng #2267 Oro Ext. Sta. Ana, Maynila, noong March 13.
Nakituloy ito sa isang kaibigan na kapitbahay naman ng suspek. Ipinakilala naman umano ng isang bugaw na nagngangalang “Niko” ang biktima sa suspek at ilang oras lamang ang nakalipas ay dinala na siya nito sa rooftop at isinagawa ang umano’y panggagahasa.
Matapos ang insidente ay binigyan umano siya ni Niko ng P400 at ginamit niya ito pagpunta sa bahay ng isa pang kaibigan na siyang tumulong para ipahuli ang parak. (Grace dela Cruz)