Isang 57-anyos na biyuda ang binaril sa dibdib at napatay matapos manlaban sa nag-iisang armadong holdaper na sapilitang umagaw sa dala niyang handbag kamakalawa ng gabi sa Taguig City.
Patay na nang idating sa Taguig-Pateros District Hospital si Godofreda Cabana, ng Block-112 Lot-15 Purok 6 Sitio Imelda, Upper Bicutan, Taguig matapos tumagos sa kanyang puso ang bala ng hindi pa batid na kalibre ng baril.
Mabilis namang tumakas ang hindi pa nakikilalang salarin, bitbit ang handbag ng biktima na hindi pa batid kung ano ang mga nilalaman.
Sa pagsisiyasat ni PO3 Junryn Obico ng Criminal Investigation and Detective Management Unit ng Taguig Police, nangyari ang pamamaril dakong 7:10 ng gabi sa harapan ng isang barangay outpost sa Sitio Imelda ilang metro ang layo sa bahay ng biktima.
Pauwi na umano si Cabana nang harangin at tutukan ng baril ng nag-iisang suspek at pilit na hinablot ang kanyang dalang bag.
Hindi naman nagpasindak ang biyuda at nanlaban pa sa suspek kaya pinaputukan na siya sa dibdib. (Lordeth Bonilla)