Dahil sa sobrang lungkot at depresyon matapos na iwanan ng kanyang misis, winakasan na lamang ng isang preso ang kanyang buhay sa pamamagitan ng pagbibigti sa loob ng kanyang selda kahapon ng madaling-araw sa Ermita, Mayniila.
Dead-on-arrival sa Philippine General Hospital ang biktimang si Guido Ferrer, alias Boyet Bulag, 33, pedicab driver ng 832 Oroquieta St., Sta Cruz, Manila.
Batay sa isinagawang imbestigasyon, nadiskubre ang bangkay ng biktima dakong alas-3:30 ng madaling-araw ng kapwa inmate nito na si Esmael Cassim sa loob ng detention cell ng MPD-District Anti Illegal Drugs (DAID), MPD compound, U.N. Avenue, Ermita, Manila.
Una rito ay naikuwento na umano ng biktima kay Cassim ang kalagayan ng kanyang mga anak at naiisip umano nito kung kumakain pa ang kanyang mga anak matapos na iwanan siya ng kanyang live-in partner at madakip siya ng pulisya. Dakong alas-3:30 ng madaling-araw nang magising si Cassim at nadiskubre ang kapwa inmate na nakabigti na ito gamit ang isang electrical cord.
Sa rekord, si Ferrer ay inaresto sa kasong paglabag sa Section 5 Article III ng RA 9165 (Drug Pushing) at walang piyansa.
Gayunman, iniimbestigahan pa rin ng mga awtoridad kung may naganap na foul play sa pagkamatay ng biktima at kung paano hindi napansin ng desk officer ng naturang division ang pagkamatay ng biktima dahil halos nasa likuran lamang ng desk counter ang detention cell. (Grace dela Cruz)