Upang matiyak na walang bantay-salakay na drug user, isinailalim ng pamunuan ng Philippine Drug Enforcement Agency (PDEA) sa isang sorpresang drug test ang kanilang 882 empleyado at opisyales kahapon ng umaga.
Nabatid na ipinatawag ni PDEA Director General Dionisio Santiago ang kanyang mga Regional at Provincial Directors at mga staff nito upang dumalo sa regular na flag-raising ceremony at para sa ibibigay umanong award.
Nagulat na lamang ang mga ito maging ang mga empleyado ng PDEA headquarters sa Brgy. Pinyahan, Quezon City nang biglang papilahin at isa-isang isailalim sa drug test sa pangunguna mismo ni Santiago, Dep. Director General Rodolfo Caisip at maging mga miyembro ng PNP na nasa ilalim ng PDEA.
Ayon kay Santiago, ang pagsasagawa sa random drug test ay isang mabisang paraan upang makatiyak na walang isa man sa empleyado ang posibleng nasasangkot sa paggamit ng ilegal na droga.
Hangarin din ng ahensiya na maging simbolo at idolo ang mga kawani nito upang pamarisan ng iba pang tanggapan ng pamahalaan, pribadong tanggapan at ng publiko upang tuluyang mawakasan na ang salot na ilegal na droga.
Tiniyak naman ni PDEA Laboratory Service head Marilyn Dequito na kanilang ipapaalam sa publiko ang resulta ng drug test sa araw na maaaring ipalabas ngayong araw (Martes) upang mabatid kung may magpopositibo sa mga sumailalim sa nasabing drug test. (Danilo Garcia)