Lola kinatay ng anak na may sayad

Kalunus-lunos na kamatayan ang sinapit ng isang lola makaraang walang awang tadtarin ng saksak ng kanyang sariling anak na sinasabing may diperensya umano sa pag-iisip kamakalawa sa Quezon City.

Namatay habang nilalapatan ng lunas sa Capitol Medical Hospital ang biktimang si Lucita Lee, 64, ng #71 Mahogany Road, Pillar Village, Las Piñas City.

Naaresto naman ng mga awtoridad ang sus­pek na 36-anyos na anak ng biktima na si Nar­cissus, walang trabaho at residente rin ng naturang lugar.

Sa ulat ng Quezon City Police District-station 10,  naganap ang krimen dakong alas-11 ng gabi sa may #77 Hyacinth St., Roxas District sa na­sabing lungsod.  Nabatid na dumalaw ang mag-ina sa isa nilang kamag-anak sa nasabing lugar at kasalukuyang natutulog ang biktima sa isang kuwarto nang pasukin ng suspek.

Sa hindi pa mabatid na dahilan, bigla na lamang sunud-sunod na inundayan nito ng saksak ang sariling ina na dahilan ng kanyang kamatayan.

Sa inisyal na imbestigasyon, sinabi ng mga ka­anak ng biktima na kalalabas pa lamang umano sa National Center for Mental Health sa Manda­luyong City si Narcissus dahil sa nararanasan nitong nervous breakdown at pagkawala sa sariling katinuan. (Danilo Garcia)