Kasong ‘pandaraya’ vs 13 guro sa Navotas, ibinasura

Tuluyang  ibinasura ng piskalya ng Navotas City ang kasong isinampa ni dating Malabon-Navo­tas Lone District Con­gress­man  Ricky San­doval laban sa 13 guro na umano’y sangkot sa da­yaan sa naganap na eleksiyon noong May 14, 2007.

Sa ilang pahinang resolution, na nilagdaan ni Navotas City Chief Pro­­secutor Jorge Catalan, Jr., lumalabas na ang kasong Tolerance in the Commission of Offense (article 208 of revised penal code) na isinampa ni Sandoval laban sa mga guro ay walang sapat na batayan o ebidensiya, kung  kaya’t ito ay ibina­sura ng piskalya.

Kabilang sa mga gu­rong napawalang-sala ay sina Amada Laurel; Ce­cilia de Castro; Bernarda Aguilar at Maritess Ale­jandro ng Bangkulasi Elementary School; Ma­rivic Sison; Yolanda Feli­zardo; Minerva Ocap ng Navotas Elementary School; Mercedita Lau­reano; Cleofe Enriquez; Maritess Pesare ng San Roque Elementary School; Fe Mondido ng Kaunlaran High School; Teodora Arriesgado ng Dagat-dagatan Elemen­tary School at Susan Mabalot ng Kapitbahayan Elementary School.

Binalewala rin ng pis­kalya ang akusasyon ng kampo ni Sandoval na may naganap na dayaan na pumapabor sa nagwa­ging kandidato sa pagka-alkalde ng lungsod na si Mayor Tobias “Toby” Tiangco.

Napatunayan din sa piskalya na hindi maaring maging batayan ang mga salaysay ng mga watcher ni Sandoval, na tuma­yong mga saksi ng dating kongresista dahil hindi nagtugma ang mga pa­hayag ng mga ito laban sa mga gurong inaku­sahan.

Ikinatuwa naman ng mga gurong inakusahan ang naging desisiyon ng piskalya  at sinabi pa ng mga ito na sa pagka­kataong ito ay lumabas din ang katotohanan ka­sabay ng paglilinis sa kanilang mga pangalan sa paratang na ito ni Sandoval.

Kaugnay nito, sinubu­kan namang kunan ng pahayag si Sandoval hinggil sa naging desis­yon ng piskalya sa isi­nampa nitong kaso ngunit hanggang sa kasaluku­yan ay hindi pa rin ito nag­bi­bigay ng kanyang panig. (Lordeth Bonilla)