Nagdulot ng trahedya sa isang 44-anyos na lalake ang pagiging magaling nito sa bilyar matapos itong pagbabarilin hanggang sa mapatay ng nakalaro nito nang matalo sa pustahan kamakalawa ng gabi sa Caloocan City.
Si Danilo Morales ng Block 60, Lot 20, Riverside, Phase 12, Bagong Silang ng nabanggit na lungsod ay hindi umabot ng buhay sa San Lorenzo Hospital sanhi ng mga tinamong tama ng bala ng baril sa dibdib at kanang braso.
Kasalukuyan namang nagsasagawa ng manhunt operation ang mga awtoridad laban sa hindi pa nakikilalang suspek.
Sa imbestigasyon ni PO1 Pidencio Saballo, Jr., ng Caloocan City Police, naganap ang insidente da kong alas-8:30 ng gabi sa loob ng isang bilyaran malapit sa bahay ng biktima.
Base sa pahayag ng mga saksi, unang nakitang naglalaro ng bilyar ang biktima kung saan lagi itong nanalo dahil sa pagiging magaling nito.
Dahil dito ay naasar ang suspek na kanyang kalaro dahil madalas na matalo sa kanilang pustahan.
Sa galit na suspek, kinuha nito ang nakatagong baril at walang sabi-sabing pinaputukan ang biktima, dahilan upang duguang humandusay ito.
Hindi pa nakunteto ang suspek, muli nitong pinaputukan ang biktima at saka tumakas.
Mabilis na isinugod ang biktima ng ilang mga taong naroroon sa nabanggit na pagamutan, subalit hindi na nakarating ng buhay. (Lordeth Bonilla)