Isang 27-anyos na dalaga ang pinatay sa saksak ng kanyang live-in partner matapos magtalo ang mga ito sa loob ng kanilang inuupahang bahay kahapon ng madaling araw sa Malabon City .
Hindi umabot ng buhay sa Tondo Medical Center sanhi ng mga tinamong saksak sa iba’t-ibang bahagi ng kanyang katawan ang biktimang si Melody Sta. Teresa, 27, ng Dagat-Dagatan, Barangay Longos ng nabanggit na lungsod.
Kasalukuyang tinutugis ng pulisya ang suspek na si Baltazar Acol, Jr., 26.
Ayon kay Marvin Rosell, kalapit kuwarto ng mag-live-in partner, narinig niyang sumisigaw at humihingi ng tulong ang biktima kaya agad niyang tinungo ang inuupahang bahay ng dalawa.
Pero hindi niya mabuksan ang pintuan ng inuupahang kuwarto ng mag-live-in partner kaya humingi siya ng tulong sa mga barangay tanod.
Nang wasakin nila ang pinto, Tumambad sa kanila ang biktima na naliligo sa sariling dugo na agad na isinugod sa nabanggit na pagamutan subalit hindi ito umabot ng buhay habang ang suspek ay hindi na inabutan at mabilis na tumakas matapos ang pananaksak. (Lordeth Bonilla)