4 karnaper arestado

Nasakote  ng mga awtori­dad ang apat na karnaper kabilang ang isang dating tauhan ng Traffic Management Group sa magkakahiwalay na operasyon sa Quezon City at Caloocan City.

Unang naaresto ng mga tauhan ng Quezon City Police District-Anti-Carnapping Unit (QCPD-ACU) ang mga suspek na nakilalang sina Samuel Paypa, 39  at Frisco delos Reyes, 29 kapwa taga-Tala, Caloocan City.

Una nang nakatanggap ng flash-alarmed ang QCPD-ACU nang tangayin ng mga arma­dong suspek ang isang pulang Toyota Vios (ZEZ-235) na pag-aari ng isang Joaquin Miguel Belgica ng 3 Parokya Road, Bagbag Novaliches, Quezon City habang nakapa­rada ito sa tapat ng North Doc­tor’s Hospital sa Tala, Caloo­can City no­ong Disyembre 6, 2007.

Lulan sa nasabing kotse ang 6-anyos na lalaking anak ni Belgica na ibinaba ng mga suspek sa gate ng Amparo Sub­division sa Barangay 179 Tala, Caloocan City.

Natiyempuhan naman ng nagpapatrolyang isang mobile patrol car ng QCPD ang nakaw na sasakyan hanggang sa mag­­karoon ng habulan. Inabu­tan ito sa kanto ng Minda­nao Avenue at Commonwealth Ave­nue­ at naaresto sina Paypa at Delos Reyes.

Sa interogasyon, inamin nina Paypa at Delos Reyes na may dalawa pa silang kasab­wat na siyang magpo-proseso ng pagsakay sa barko sa Manila North Port ng naturang nakaw na kotse.

Agad namang nagsagawa ng follow-up operation ang QCPD-ACU at sa tulong ni Paypan at Delos Reyes, na­dakip ang isa pang suspek na si Benjamin Verzosa, 55 at Edgardo Habana, 39 at dating police officer na naka-assigned sa TMG at residente ng 251 Market Ave., San Miguel Pasig. (Danilo Garcia)