Holdaper dedo sa hinoldap na pulis

Napatay ang isang  kilabot na holdaper makaraang mag­kamaling holdapin ang isang pulis at makipagpalitan ng putok dito, kamakalawa ng gabi  sa Quezon City.

Dead-on-the-spot ang sus­pek na si George Pingol, 30,  resi­dente ng San Vicente St., San Francisco del Monte sa na­sabing lunsod.

Samantala, ginagamot naman sa Quezon City Gene­ral Hospital (QCGH) ang bik­timang si PO1 Felicito Men­doza nakatalaga sa QCPD Station 4 dahil sa tinamong tama ng bala sa kanyang hita.

Sa ulat ng pulisya, na­ganap ang insidente dakong alas-10 ng gabi sa Mindanao Extension sa kanto ng Lucaria St.  Brgy. Talipapa ng nabang­git na lungsod.

Nabatid na naglalakad ang biktima nang harangin ng sus­pek na nakasakay sa motor­siklo saka tinutukan ng baril ang biktima.

Nabatid na nagdeklara ng holdap ang suspek matapos tutukan ng baril ang pulis su­balit agad nabunot ng huli ang kanyang service firearm at pina­putukan sa iba’t ibang parte ng katawan ang una. Nabatid na nakapagpaputok din ng baril ang suspect na ikinasugat ng biktimang parak. (Angie dela Cruz)