Condo sa Pasay tinaniman ng ‘bomba’

Muntik magka-stampede ang mga umuupa sa isang condominium sa Pasay City matapos makadiskubre rito ng dalawang bote na hinihinalang bomba, kahapon ng umaga.

Binalot ng sindak at ma­tinding tensiyon ang mga tenants at nag-unahang mag­panakbuhan ng matagpuan ng isang janitor sa ikatlong palapag ng Somerset Man­sion na matatagpuan sa Leveriza St., Pasay City  ang dalawang botelya na may mga nakalawit na electirical wirings malapit sa swimming pool ng naturang condo. 

Sa panayam kay PO3 Joel Landicho, ng Criminal Investi­gation Division (CID)-Pasay City Police, ang dalawang mag­kadikit na bote ay may mga koneksiyon ng electrical wirings, ballast, neon lights at nakabalot sa fiberglass na magsisilbing shrapnel saka­ling sumabog ito. 

Kaugnay nito, labis na natakot ang naturang janitor sa inakalang bomba  kaya agad niya itong ipinagbigay-alam sa security officer ng nasabing condo na si Cesar Alcantara, 54.

Agad namang nakaabot sa kaalaman ng mga tenants ang pagkakatuklas sa sinasabing bomba kung kaya’t naalarma ang mga ito na naging sanhi upang magkagulo sa loob ng gusali at nag-unahan sa pag­labas sa gusali.

Nabatid pa na si Alcantara ay sinasabing dating sundalo at may kaalaman hinggil sa mga pampasabog kaya pina­ki­alaman nito ang dalawang bote na nakapatong sa ma­laking fiberglass. At mula sa ikatlong palapag ng gusali ay ibinaba nito sa ground floor ang sinasabing bomba bago itinawag sa mga tauhan ng Special Weapons & Tactics-Explosive Ordnance Division (SWAT-EOD) ng Pasay City Police.

Kaagad namang dumating ang Bomb Squad sa pangu­nguna ni Sr. Insp. Lerpon Platon, hepe ng SWAT-EOD at lumitaw sa kanilang pagsu­suri na wala pang kakayanang sumabog ang naturang ina­kalang bomba.

Dahil dito, tiniyak ni Platon na ang tanging pakay o motibo ng suspect na naglagay nito ay maghasik ng takot sa mga tenants ng condominium.

Gayunman, pinasabog naman sa ligtas na lugar ng mga tauhan ng EOD ang na­tuklasang botelya upang maka­tiyak na hindi ito maka­sakit, makapaminsala o ma­kapag-kitil ng buhay ng tao.

Lumalabas din sa isina­gawang imbestigasyon ng awtoridad na may namama­gitang alitan sa pagitan ng developer at mga residente kaugnay sa pagpapalakad ng administrasyon ng nasabing condominium.

Sa kasalukuyan ay ina­alam na rin ng pulisya kung sino ang responsable sa pag­lalagay ng nasabing “bomba” para papanagutin ito at ipagharap ng kaukulang kaso.