Pandacan oil depot, bantayan – Biazon

Matapos ang malagim na pagsabog sa South Wing ng Batasan Complex kung saan nasawi ang tatlo katao ka­bilang na si Rep. Wahab Akbar, iginiit kahapon ni Sen. Rodolfo Biazon ang mahigpit na pagbabantay sa mga maha­halagang lugar sa Metro Manila kabilang na ang oil depot sa Pandacan.

Kung target umano nang pambobomba ang  buong gobyerno ay posibleng puwe­deng maulit ang insidente sa ibang government facility.

Nakiusap din si Biazon na iwasan muna ang mga ispe­ku­lasyon kaugnay sa totoong dahilan nang pambobomba at hayaan na lamang muna ang isinasagawang imbesti­gasyon.

Inamin din nito na kinaba­han siya nang marinig ang balita tungkol sa pagpapa­sabog sa Batasan Complex dahil naroon ang anak niyang si Muntinlupa Rep. Ruffy Biazon.

Sinigurado naman ni Se­nate President Manuel Villar na hindi maapektuhan ng pagsabog ang trabaho ng Senado.

Naging kapuna-puna ang mahigpit na seguridad ka­hapon sa Senado at hindi na pinapayagang makapasok sa Senate ground ang mga pub­lic utility jeep o mas kilala sa tawag na orange jeep. (Malou Escudero)