4 ‘kotong’ cops arestado

Apat na pulis-Maynila ang nadakip ng ka­nilang mga ka­samahan matapos na umano’y koto­ngan ng mga ito ang dala­wang babae na magka­angkas sa motorsiklo sa Sampaloc, Maynila kamakalawa ng gabi.

Isinampa sa sala ni Assistant Chief Prosecutor Raul Hismiro ang kasong extortion, molesta­tion, planting of evidence at obstruction of  justice laban kina Chief Insp. Resty Nicandro, SPO1 Maurito Reniedo, PO2 Christopher Pantaleon at PO1 Victorino Salao, pawang naka­talaga sa Anti-Illegal Drugs Section ng MPD-Station 4 (Sampaloc).

Habang inaalam pa ang pag­kakakilanlan sa tatlo pa nilang kabaro na kakutsaba rin sa pangongotong.

Dinakip ang mga nabanggit na pulis-Maynila matapos na ireklamo ang mga ito ng bik­timang sina  Jesusa Manalan­sang, 28; at Jennifer Capuso, 23, kapwa  residente ng  Jaime St., Sampaloc, Manila.

Sa isinagawang imbestigas­yon  ni Supt. Hospicio Guevarra ng MPD-General Assignment Section (GAS), ang insidente ay naganap dakong 11:45 ng gabi sa kanto ng Blumentritt Extn. at Sto. Tomas St., Sam­­paloc, Ma­nila.  Sa ibinigay na pahayag ni Jesusa, kaangkas niya si Jenni­fer sa kanyang kulay itim na motorsiklo, Honda Wave 100 at  pagsapit sa naturang lugar ay bigla umano silang hinarang  ni Pantaleon na noon ay lulan sa kulay puting Adventure at sinita sila.

Hiningi umano ng pulis ang kanyang lisensiya hanggang sa posasan sila at puwersahang pina­pasok sa kanyang sasak­yan at dinala sa Station 4 nang wala man lamang umanong pa­liwanag kung ano ang kanyang violation. Habang nasa tangga­pan ng pulisya ang dalawa, kinapkapan umano sila ni Pantaleon, kinuha ang kanilang wallet na may laman na P700 at cellphone habang ang alahas naman nila ay kinuha rin ni Reniedo at dinala umano sa tanggapan ni Nicandro.

Nakita umano nila na ha­bang iniinspeksiyon ni Nicandro ang gamit nang dalawa ay pa­simple umanong tinaniman ito ng “shabu” at inakusahang gumagamit sila.

Ilang minuto ay dumating ang ina ni Jesusa na si Leoner at kinausap umano siya ni Nicandro at hiningan ng hala­gang P120,000 kapalit ng kaso at paglaya ng dalawa. Nagka­roon ng tawaran hanggang sa umabot ng P30,000. 

Bunsod nito’y agad na humi­ngi ng tulong si Leoner, na empleyado ng Department of Interior ang Local Govern­ment (DILG) kay Manila Mayor Al­fredo Lim na nag-utos ng imbestigasyon.

Ang apat ay kasalukuyang naka­detine sa MPD Detective Jail. (Grace dela Cruz)