Nasamsam ng mga ahente ng National Bureau of Investigation (NBI) ang P9-M halaga ng libu-libong pekeng Tide detergents sa isinagawang raid nito sa Tondo, Manila.
Ayon sa NBI, isinagawa ang pagsalakay sa Junchem Trading na matatagpuan sa 2956 Dagupan Extension, Gagalangin, Tondo matapos na maghain ng reklamo dito ang kompanyang Procter and Gamble Company (P&G). Nabatid na doon ginagawa ang mga pekeng Tide powder. Isinagawa ang raid batay na rin sa search warrants na ipinalabas ni Judge Aida E. Layug, ng Manila Regional Trial Court Branch 46. Bunsod nito’y, nasamsam ang 1,113 boxes na puno ng powder detergent at 16,800 kahon na ginamitan ng bulls-eye device at eraser devise ng P&G upang makopya nito ang Tide detergent powder.
Nasamsam din ang 144 kahon na puno rin ng powder na sabon at 650 kahon na walang laman at illegal na tinatakan din ng bulls-eye device at eraser devise ng P&G. Isasampa naman ang kasong paglabag sa Section 168 in relation to Section 170 ng RA 8293 o mas kilala bilang Intellectual Property Code of the Philippines. (Grace dela Cruz)