Isang tatlong taong gulang na batang lalaki ang nasawi matapos mapisak, magulungan at makaladkad ng isang owner type jeep na minamaneho ng isang empleyado ng Court of Appeals kahapon sa lungsod Caloocan.
Kinilala ni Sr. Insp. Abner Yambao Castro, hepe ng Station Traffic Enforcement Unit ng Caloocan Police, ang biktima na si Kenji Galdones ng 6 Boston Street, University Hills ng nabanggit na lungsod.
Kusang-loob namang sumuko sa pulisya ang driver na si Danilo Salvador, 63, may-asawa, at Utility II ng Court of Appeals.
Lumilitaw sa pagsisiyasat na bumabagtas sa UE Subdivision sa may tapat ng Drexel Technology sa naturang lunsod ang owner-type jeep na minamaneho ni Salvador nang biglang tumawid ang biktima at masalpok ito ng sasakyan.
Nagulungan pa ang katawan at ulo ng bata at nakaladkad ng ilang metro ng jeep. Nahaharap si Salvador sa kasong reckless imprudence resulting to homicide. (Lordeth Bonilla)