Masaklap na kamatayan ang sinapit ng isang probinsiyanang katulong matapos na tadtarin ng saksak ng hindi pa nakikilalang mga salarin, kamakalawa ng gabi sa Caloocan City.
Namatay sa mismong pinangyarihan ng insidente sanhi ng hindi mabilang na saksak sa iba’t ibang parte ng katawan ang biktimang si Susana Lumactod, 28, tubong Surigao del Norte at stay-in housemaid sa 32 Progreso St., Brgy. Tugatog, Malabon City.
Kasalukuyan namang nagsasagawa ng masusing imbestigasyon ang mga awtoridad upang matukoy ang pagkakakilanlan ng mga suspect na mabilis na tumakas matapos ang isinagawang krimen at ang motibo ng mga ito sa pamamaslang sa biktima.
Batay sa ulat ng pulisya, dakong alas-6:30 ng gabi nang maganap ang insidente sa kahabaan ng Block 6, Labahita St., Kaunlaran Village, Caloocan City.
Lumalabas sa isinagawang imbestigasyon na kasalukuyan umanong naglalakad ang biktima sa naturang lugar nang salubungin ito ng hindi nakikilalang mga salarin na pawang armado ng patalim. Bago tuluyang paslangin ng mga suspect ang biktima ay posibleng iginapos muna umano ang dalawang kamay nito, tinakpan ang bibig upang hindi makapanghingi ng tulong saka inundayan ito ng sunud-sunod na saksak sa iba’t ibang bahagi ng kanyang katawan.
Agad namang isinailalim sa autopsy ang bangkay ng biktima upang alamin kung may nangyaring panggagahasa dito bago siya tuluyang paslangin ng mga suspect. (Rose Tamayo-Tesoro)