Pinaniniwalaang ginahasa muna saka pinagsasaksak hanggang sa mapatay ang isang di nakilalang babae na natagpuang nakabulagta sa isang kalye sa Malate, Maynila kahapon ng madaling-araw. Inilarawan ang biktima na nasa gulang na 20-25, may taas na 5’4 talampakan, kulot ang buhok, Natagpuan itong walang saplot sa katawan at tadtad pa ng saksak.
Sa report ni Det. Manuel Sarmiento ng Manila Police District (MPD)-Homicide section, dakong alas-5:20 ng umaga nang matagpuan ang bangkay ng biktima sa kanto ng Don Pedro at Arellano Sts., Malate, Maynila.
Ayon kay Teejay Silva, 23, pedicab driver, kasalukuyang pinapasada nito ang kanyang pedicab nang mapadaan sa naturang lugar at napansin ang bikima na nakatihaya sa nasabing lugar kaya agad niya itong ipinagbigay alam kay Chairman Logie Estacio ng Brgy. 762 Zone 82 na siyang nag-report sa pulisya.
Dalawang teorya ang pinapag-aralan ng pulisya kabilang na ito ay ang posibleng insidente ng panghoholdap at saka pinag-interesang gahasain ang biktima o ginahasa ito at nanlaban kaya pinatay.
Hinala din ng pulisya sa ibang lugar isinagawa ang krimen at iniwan lamang ang katawan ng biktima sa naturang lugar upang iligaw ang mga imbestigasyon ng pulisya.