Mister nagpainom na, sinaksak pa ng bisita

Isang  mister ang nasa kri­ti­kal na kondisyon  matapos pag­sasaksakin ng kanyang kainu­mang bisita na napikon sa pag­tatalo ng una at asawa nito, kama­kalawa ng gabi sa Malabon City .

Kasalukuyang inoobserba­han sa Jose Reyes Memorial Medical Center (JRMMC) sanhi ng mga saksak sa kanyang kata­wan ang biktimang si Bonifacio Libunao Sr., 49, jeepney driver ng #112 Judge Oreta Perez Street, Brgy. Tonsuya ng na­banggit na lungsod.

Patuloy namang pinagha­hanap ng mga elemento ng Malabon-PNP ang suspek na si Allan Ruiz “alyas Am-am”, 29, ng Indang, Cavite. 

Ayon sa ulat ni PO2 Edcel dela Paz, may hawak ng kaso, na­ganap ang insidente dakong alas-8:15 ng gabi sa panulukan ng Judge Oreta C. Perez Street, Brgy. Tonsuya ilang metro lamang ang layo sa bahay ng biktima.

Nabatid na katatapos la­mang mag-inuman ng biktima at suspek kung saan nang maka­ramdam ng gutom ay naghanap ng makakain ang biktima sa   misis niyang si Leonor Molinao,  subalit  ng walang maihain ang babae ay nag-init ang ulo ng una hanggang magtalo ang mag-asawa.

Upang hindi na lumala ang away ay minabuti ng biktima na lumabas ng bahay upang ihatid ang suspek at kinompronta ng huli ang una hinggil sa ginawa nitong pang-aaway sa kanyang asawa.

Base sa pahayag ng saksing si Bonifacio Jr., anak ng biktima, habang nasa gitna ng pagtatalo ay mabilis na nagbunot ang suspek ng patalim at sinaksak ang kanyang ama ng ilang beses sa dibdib at likod bago tumakas sa di-nabatid na direksiyon. (Lordeth Bonilla)