2 biktima ng salvage, natagpuan sa Maynila

Pinagtatadtad ng saksak  at ibinalot  ng packaging tape ang mukha at tinalian ng steel wire ang mga kamay nang matag­puan ang isang lalaki at isang ba­bae na pinaniniwalaang bik­tima ng salvage sa Maynila, ka­hapon ng madaling-araw.

Walang nakuhang anumang pagkakakilanlan sa dalawang biktima na ang lalaki ay nasa gulang na 25-30-anyos, mahaba ang buhok, nakasuot ng maong pants at tadtad ng tattoo sa buong katawan, habang ang babae naman ay tinatayang nasa gulang na 20-30-anyos, maiksi ang buhok, nakasuot ng asul na t-shirt, light blue na shorts at may tattoo na BCJ sa kanang paa.

Batay sa isinagawang im­bestigasyon ni Det. Jonathan Bautista ng Manila Police District (MPD)-Homicide Section, da­kong ala-1 ng madaling-araw nang makita ang bangkay ng la­laking bik­tima sa kanto ng Soler at Trini­dad Sts., Quiapo, habang ang babaeng biktima ay natag­puang patay dakong ala-1:15 ng mada­ling-araw sa kanto ng 656 P. Gomez at Raon St., Quiapo, Manila.

Sa kabila na sa magka­hiwalay na lugar natagpuan ang dalawang biktima malaki ang paniwala ng mga awtoridad na posibleng iisa ang may gawa ng krimen dahil sa pareho ang pa­raan sa pagpaslang sa mga ito.

May nakuhang karatula sa bangkay ng lalaki na nakalagay ang ganito: “Huwag ninyo akong tularan holdaper ako”.

Samantalang ganito naman ang nakasulat sa bangkay ng babae: “Babala sa lahat ng ti­ rador huwag n’yo akong tula­ran man­durukot ako bilang na oras n’yo”.

Ang dalawa ay hinihinalang biktima ng salvage na maaring pinatay sa ibang lugar at itinapon na lamang sa naturang lugar.  (Grace Amargo dela Cruz)