Dahil sa umano’y pagka kunsume sa pagbubunganga ng kanyang misis, nagtangkang magpakamatay ang isang mister nang saksakin nito ang sarili sa gitna ng pakikipagtalo sa kanyang asawa, kamakalawa ng gabi sa Quezon City.
Hindi naging matagumpay ang pagpapakamatay matapos na mailigtas ng mga manggagamot ng Quirino Memorial Medical Center si Rodolfo Ordones, 21, ng #129 Bignay Street, Project 2, ng naturang lungsod.
Sa inisyal na ulat ng pulisya, dakong alas-9 ng gabi nang maganap ang insidente sa loob ng bahay ni Ordones kung saan nakaaway nito ang asawang si Marivic dahil sa problema sa paghihirap ng kanilang pamilya.
Humantong sa sigawan at pagsisihan kung bakit pa sila nagpakasal sa kabila ng hirap na daranasin hanggang sa maghamon ang mister na magpapakamatay na lang upang mawala na ang problema ni misis.
Hindi naman umano tumigil sa kadadakdak ang misis hanggang sa magtungo sa kusina si Rodolfo, kumuha ng kutsilyo at inundayan ng saksak ang sarili. Dito lamang natauhan si Marivic at mabilis na isinugod sa pagamutan ang kanyang mister na naagapan naman ng mga manggagamot. (Danilo Garcia)