Ipinagdiinan kahapon sa korte mismo ng mga anak ni Mark Jimenez (MJ) na ang nasabing kontrobersiyal na negosyante ang “mentally and psychologically insaned” o may problema sa pag-iisip at hindi ang kanilang madrasta na si Carol Castaneda na sinasabing pina-rehab ng huli.
Sa panayam ng PSN kay Virgilio Crespo na anak ni MJ sa unang asawa nito matapos ang isinagawang pagdinig kahapon sa Taguig Regional Trial Court sa sala ni Judge Lorefel Pahimna ng Branch 69, nasaksihan umano nila sa loob ng 30 taon na pagsasama ng kanyang ama at ni Carol ang ginawang kalupitan at pang-aabuso nito sa huli.
Ayon pa kay Virgilio na patutunayan din umano nila sa korte na mismong si MJ ang nagdu-droga at hindi si Carol.
“He is taking a lot of medicines at mismong siya pa ang dumidikta sa kanyang doktor kung ano ang gusto niyang inumin na gamot in fact he voluntarily called Carol mentally insaned “, pahayag pa ni Virgilio.
Sinabi pa ni Virgilio na naaawa sila kay Carol dahil nasaksihan nila ang pagmamalupit at pang-aabuso sa kanya ni MJ sa loob ng mga taon ng kanilang pagsasama.
“We love you dad, tama na pakawalan mo na si Carol. No one believing you now. We have an adverse feeling and we fear for Carol’s life” pahayag pa ni Virgilio.
Humingi naman ng tulong kahapon sa media ang kampo ni Carol na tulungan silang kumbinsihin si MJ na pakawalan at ilabas na nito ang nasabing ginang.
Samantala, sa kabila ng patung-patong na motion at inhibition na isinampa ng magkabilang panig sa korte ay nagpalabas naman ng “gag order”kahapon ang nasabing korte kapwa para sa kampo ni MJ at Carol hinggil sa apela ng huli para gawing permanent protection ang isinampa nitong temporary protection. (Rose Tamayo-Tesoro)