Iniutos ni MPD Director Sr. Supt. Danilo Abarzosa ang paglalagay sa "floating status" kay Senior Inspector Edgar Reyes at PO3 Delfin Silva matapos mapatunayang may "probable cause" ang reklamong pangongotong laban sa kanila ni Ma. Lalaine Buenaventura.
Base sa "sworn statement" ng biktimang estudyante, hiningan umano siya ni Reyes ng halagang P150,000 kapalit ng kalayaan ng kanyang boyfriend na si Cho Ka at tatlo pang Chinese national na inaresto ng mga tauhan ng MPD-Mobile Patrol Unit matapos makasira ng isang motorsiklo.
Sinabi ni Buenaventura, sa loob mismo ng MPD-GAS, nagkaroon ng bayaran na umano’y tinanggap ng tauhan ni Reyes. Isinangkalan pa umano ni Reyes ang mga mamamahayag kaya ganun kalaki ang hiningi sa kanya. Dahil sa inasal at paggamit ni Reyes sa pangalan ng media, agad itong binatikos ng mga opisyal ng Manila Police District Press Corps (MPD-PC). (Doris Franche)