Ayon kay BJMP Sr. Supt. Serafin Barreto Jr., BJMP National Capital Region nahaharap sa kasong simple misconduct sina SJO3 Eduardo Tayag, SJO3 Edgardo Naguimbing at SJO3 Enrique Guevarra matapos na lumabag sa regulasyon ng BJMP na nagbabawal na magdala o maglabas ng preso sa anumang lugar ng walang pahintulot ang korte.
Samantala, ang kaso laban kina dating QC jail warden Supt. Ignacio Panti at chief escort division nito na si SJO4 Henry Laus ay ibinasura matapos na mapatunayang wala itong anumang basbas sa ginawa ng tatlong jailguard. Si Panti ay sinibak sa puwesto bunga ng umano’y command responsibility.
Batay sa rekord, Disyembre 11, 2006, nang i-escort ng tatlong jailguard si Soriano sa kanyang hearing sa kaso sa Makati gamit ang sasakyan nito.
Subalit habang patungo sa korte niyaya ni Soriano ang tatlong jailguard na pumasok sa isang restaurant at kumain.
Habang kumakain ay dumating ang ilang tauhan ng Makati Police at ilang NBI agents kung saan inaaresto si Soriano sa kasong carnapping.
Lumilitaw na ang kotseng gamit nina Soriano ay carnap vehicle. Agad namang nilinis ng BJMP sa kasong carnapping ang tatlong jailguard dahil wala naman umanong alam ang tatlo na "hot car" ang kanilang sinakyan.
Ipinaliwanag naman ni Barreto na naging maingat at specific ang ibinigay na instruction nina Panti at Laus kung kaya’t agad na nilinis ang kanilang pangalan.
Nabatid na may inilalaan na pondo bilang pamasahe ang QC Jail sa pagdadala ng mga preso upang hindi gumamit ng anumang sasakyan mula sa akusado. (Doris M. Franche)