Dead-on-the-spot ang mga biktima na apat dito ay kinilala ng mga awtoridad na sina Arthur Cadorna, Ramon Villanueva, Jefferson Agipanan at Jun Azuero, pawang mga trabahador sa King Dragon Melting Aluminum na matatagpuan sa Sto. Niño, Meycauayan, Bulacan. Sila ay positibong kinilala ng kanilang mga kaanak na nagtungo sa crime scene.
Ayon kay Northern Police District (NPD) director Chief Supt. Leopoldo Bataoil, dakong alas-7:05 ng umaga nang makita ng ilang sibilyan ang mga nakahandusay at duguang mga katawan ng mga biktima sa Nova Romania Subdivision sa Deparo na agad na pinagbigay-alam sa himpilan ng pulisya.
Sa inisyal na pagsisiyasat ni SPO4 Antonio Ramos, ng Criminal Investigation Division ng Caloocan City Police, tadtad ng tama ng punglo sa ulo at katawan ang mga biktima matapos na makarekober ng basyo ng bala ng armalite at .9mm pistola sa crime scene dakong alas-7:20 ng umaga.
Ayon kay Supt. Nap Cuaton, posibleng pinagsama-sama ang mga biktima, pinaupo at pinaluhod ng mga suspect sa nasabing lugar bago pinaputukan ng sunud-sunod. Nagmamaka-awa din ang mga biktima batay na rin sa ayos ng mga kamay nito na nakapatong sa kanilang ulo.
Nauna rito, sinabi ng ilang saksi na kanilang naispatan ang isang AUV van sakay ang mga biktima at ilang kalalakihan papasok sa nasabing subdibisyon bago mag-alas-2 ng madaling araw.Iniutos naman ni Cuaton sa kanyang mga tauhan na magsagawa ng malalimang imbestigasyon hinggil sa motibo nang pagpatay sa mga nabanggit na manggagawa. (Ellen Fernando)