50 sasakyan, na-impound sa ‘No Plate, No Travel’ policy

Umaabot sa 50 sasakyan ang kasalukuyang naka-impound sa Kampo Karingal matapos na maispatan ng mga tauhan ng Quezon City Police District at National Capital Regional Police Office (NCRPO).

Ayon kay NCRPO chief Director Reynaldo Barilla, hindi napigilan ng bagyong Milenyo ang pagsasagawa ng checkpoints at monitoring ng kanyang mga pulis upang mahuli ang mga sasakyang lumalabag sa "No Plate, No Travel" policy na ipinatutupad ng Philippine National Police.

Aniya, kailangan pa ring maging alerto ng mga pulis kaugnay na rin ng posibilidad na umatake ang mga sindikato o terorista sa kasagsagan ng kalamidad.

Nabatid kay Barilla na nagsimulang manghuli ng mga walang plakang sasakyan ang mga pulis noong Huwebes sa gitna ng hagupit ni Milenyo.

Kadalasan umanong nagsasagawa ng modus operandi ang mga sindikato sa mga hindi inaasahang panahon.

Samantala, inatasan din ni Barilla ang mga pulis na magsagawa ng mga pag-iikot sa mga lugar na apektado pa rin ng brownout sa pangamba na sumalakay ang mga kriminal tulad ng snatcher, holdaper at mga miyembro ng Akyat-Bahay Gang. (Doris Franche)