Patay na nang idating sa Ospital ng Makati ang biktimang si Henry Cervantes ng 58 Guijo St., Macda Compound, Brgy. Cembo, ng nabanggit na lungsod sanhi ng tinamong ilang saksak sa iba’t ibang bahagi ng katawan. Arestado naman ang suspect na si Jake Agnunag, alyas Jec-Jec, 17, na nahaharap ngayon sa kasong homicide.
Base sa ulat ni SPO1 Lewelle Cristobal ng homicide section ng Makati City Police, naganap ang insidente dakong alas-10:15 ng gabi sa nabanggit na compound. Nauna rito, napag-alamang nag-aaway ang suspect at ang nobya nito na hindi binanggit ang pangalan hanggang sa makialam ang kanyang pinsang si Henry.
Dito nagalit ang suspect at pinagbalingan ng init ng ulo ang biktima. Mabilis na kumuha ng patalim ang suspect at walang sabi-sabing pinag-uundayan ng saksak ang kanyang pinsan na naging dahilan ng agaran nitong kamatayan. (Lordeth Bonilla)