Opisyal na sangkot sa pagpaslang kay Orsolino, sinibak

Sinibak at dinis-armahan kahapon ni Northern Police District (NPD) director Chief Supt. Leopoldo Bataoil si Sr. Insp. Roberto Dayag ng Special Weapon and Tactics Team (SWAT) ng Navotas matapos itong iturong sangkot sa pagkakapaslang sa newsman na si Alberto Orsolino.

Ayon kay Bataoil, ipinasya niyang ilagay sa floating status si Dayag dahil kailangan nitong kaharapin ang paglilitis sa kasong kriminal at administratibo na isinampa laban sa kanya.

Bukod kay Dayag, target din ng manhunt operation ang fishing magnate na si Lope Jimenez, ang sinasabing mastermind at mga tauhan nitong sina Manuel "Marko" Montero, Eric Fernandez, Norberto "Obet" Ponce at dalawa pang suspect na nakilala lamang sa mga pangalang Jun at Jr.

Ang mga nabanggit na suspect ay ikinanta ng self-confessed suspect na si Rommel Lirazan na naaresto kamakailan ng pulisya sa pinagtaguan nito sa Victoria, Laguna. (Rose Tamayo)