Sa isinumiteng report kahapon ni PNP-ASTG Executive Officer Sr. Supt. Don Montenegro kay PNP-ASTG Commander P/Director Jesus Versoza, ang mga kontrabando ay lulan ng anim pang container vans. Sinasabing bahagi ito ng 18 container vans na naunang nasabat ng PNP-ASTG sa kanilang mga operasyon.
Ayon kay Montenegro, ang naturang mga container vans ay naglalaman ng hindi deklaradong ceramic tiles at resin mula sa Hong Kong at nakatakda sanang ilagak sa bodega ng Customs sa Pasig City subalit dinala ito sa Navotas, Manila na kanilang nasabat dakong alas-7 ng umaga.
Ang tatlong container vans ay nakapangalan sa EFX International Trading Corp. na matatagpuan sa 1139 Mendoza St., Otis, Paco, Manila habang ang broker nito ay ang GB Hernandez Customs na matatagpuan sa 7890 Ninoy Aquino Avenue, Parañaque City. Ang mga resin naman ay nakapangalan sa Golden Star International Co. and Seatraders Logistics and Warehousing Inc. na ibrinoker ng isang nagngangalang Elmer Albis. (Joy Cantos)