"Hindi alam ni Lacson ang tunay na problema sa Maynila, hindi siya talagang taga-rito, kung ako kay Senador Lacson, hayaan na lamang niya ang Maynila sa mga tunay na Manileño," ayon pa sa isang pulong-balitaan na ipinatawag nito sa Manila City Hall.
Reaksiyon ito ni Lacuna nang tuluyan nang magparehistro si Lacson bilang registered voter ng Maynila sa Comelec at magpatawag ng pagpupulong sa mga lider ng 3rd district ng lugar na Chinese Community sa Savory restaurant kamakalawa. Kasunod nito, inilabas din ni Lacuna ang isinagawang survey ng City Council nitong June 2006 na nagpapakita ng pangunguna nito laban sa walong aspirant candidate, sumusunod lamang sina Senador Alfredo Lim at Lacson.
Ayon kay Lacuna, bagamat kinatatakutan niya ang pagpasok ng mga politikong taga-labas gaya ni Lacson, mas nakikita niyang ‘banta’ ang sinumang iendorso ni Mayor Lito Atienza. Sa kabila nito, hindi naman inaalis ni Lacuna ang pagkakaroon ng pagsasanib ng puwersa nila ni Mayor Lito Atienza sa darating na halalan. (Gemma Amargo-Garcia)