Bigamy, ikinasa vs Kenneth Duremdes

Kinasuhan kahapon ng kanyang asawa ng kasong bigamy sa Quezon City Prosecutors Office si Philippine Basketball Association (PBA) most valuable player (MVP) at star forward ng Sta. Lucia Realty na si Kenneth Duremdes dahil sa dalawang beses na pagpapakasal umano nito.

Ang nasabing kaso ay iniharap sa sala ni Branch 215 Judge Ma. Luisa Padilla ng Quezon City Regional Trial Court ng asawa ni Duremdes na si Vanessa Cariaga Duremdes.

Ayon sa sinumpaang salaysay ni Vanessa, ikinasal sila ni Duremdes noong September 6, 1993 sa Manila City Hall kay Rev. Jesus Mesa at muling nagpakasal umano ito sa isang babae noong August 15, 1996 batay na rin umano sa rekord ng National Statistics Office (NSO).

Samantala, pinabulaanan naman ni Duremdes ang nasabing alegasyon ni Vanessa.

Ayon pa kay Duremdes na hindi siya kailanman ikinasal kay Vanessa na naging nobya niya noong nag-aaral pa siya sa Adamson University noong 1993.

Kaugnay nito, hinihingan ng korte ng P24,000 bail para sa pansamantalang kalayaan nito. (Angie dela Cruz)