Parehong hindi na umabot pa ng buhay makaraang isugod sa magkahiwalay na pagamutan ang mga biktimang sina Teody Nabalde, 32; at Jose Jelly Nacion, 48, sanhi ng mga tinamong mga tama ng bala ng baril sa katawan.
Pinaghahanap naman ng pulisya ang suspect na si Rene Tomena, na mabilis na tumakas matapos ang isinagawang krimen.
Batay sa imbestigasyon nina SPO1 Ferdinand Samiento at PO2 Vergel Nicolas, dakong alas-6 kamakalawa ng gabi nang maganap ang insidente malapit sa bahay ng biktimang si Nacion sa Barrio Libis, Brgy. 160, Baesa, Caloocan City.
Nag-iinuman umano noon ang mga biktima at suspect nang makaroon ng mainitang pagtatalo.
Sa kalagitnaan ng pagtatalo ay bumunot ng baril ang suspect at saka pinagbabaril ang kainuman.
Nang makitang kapwa humandusay ang dalawa ay mabilis na itong tumakas.
Tinangkang isugod sa pagamutan ang dalawa subalit hindi na umabot pang buhay.
Patuloy naman ang isinasagawang manhunt operation laban sa suspect. Inaalam pa rin ang motibo ng naturang pagpaslang. (Rose Tamayo-Tesoro)