Confidential agent, 3 pa timbog sa holdap

Arestado ang isang confidential agent ng CIDG-Crame at tatlo pang kasamahan nito makaraang holdapin nila ang isang Indian national , kamakalawa ng hapon sa Valenzuela City.

Nakilala ang mga nadakip na sina Danny Serosin, 34, confidential agent ng CIDG-Crame; Ernie Espinosa, 34; Rolando Asuncion, 28 at Enrique Bayot, 28, na pawang residente ng Novaliches, Quezon City.

Batay sa ulat na tinanggap ni NPD director Chief Supt. Leopoldo Bataoil dakong ala-una ng hapon ng holdapin ng grupo ni Serosin ang isang Bombay na si Romy Singh, 35, sa Sampaloc St., Brgy. Ugong, Valenzuela City.

Bukod sa P10,000 na nakulimbat ng mga suspect ay tinangay din ng mga ito ang Yamaha 125 motorcycle ng biktima bago tuluyang nagsitakas.

Nasakote ang mga suspect ng mga nagrespondeng motorcycle patrol unit ng Valenzuela City Police at nabawi mula sa kanilang posesyon ang motorsiklo ng biktima.

Isang .45 cal. na baril ang nasamsam sa mga suspect. Inihahanda na ang kaukulang kaso laban sa mga ito. (Rose Tamayo-Tesoro)