Western Union nilooban ng 6 na armado

Nalimas ng mga holdaper ang mahigit sa P2 milyong cash at $13,000 makaraang looban ng mga ito ang isang sangay ng Western Union Money Transfer sa Christopher Plaza sa Quirino Highway, Lagro, Quezon City.

Ayon sa ulat, anim na hindi nakikilalang armadong kalalakihan ang sinasabing nagpanggap na mga kliyente

Apat sa mga ito ang pumasok sa loob ng establisimento habang ang dalawa ay nagsilbing look-out.

Nang makapasok ay agad na nagdeklara ng holdap kung saan isa-isang tinutukan ng baril ang mga teller at pinalabas ang lahat ng pera sa kanilang mga kaha.

Matapos na makulimbat ang malaking halaga ay mabilis na tumakas ang mga suspect sakay sa dalawang motorsiklo na walang plaka.

Isang manhunt operation ang inilunsad ng pulisya laban sa mga suspects. (Angie dela Cruz)