Ginang lasog sa tren

Isang 30-anyos na ginang ang nagbuwis ng kanyang buhay makaraang sagipin nito ang 2-anyos niyang anak na siya sanang masasagasaan ng tren, kahapon ng umaga sa Taguig City.

Nasawi noon din ang ginang na si Liza Pamen, ng TUP Compound Brgy. Western Bicutan ng nasabing lungsod.

Ayon sa pahayag ng isang alyas Jinggoy, purok lider sa Taguig City Traffic Enforcement Unit, naganap ang trahedya dakong alas-7 ng umaga sa PNR Site, Brgy. Western Bicutan ng nabanggit na lungsod.

Nabatid na naglalakad ang mag-ina nang biglang humulagpos sa pagkakakapit at saka nagtatakbo ang kanyang anak na babae hanggang sa tumawid sa riles ng tren.

Isang tren ang paparating kung saan nataranta ang ginang at upang iligtas ang kanyang anak ay itinulak niya ito.

Bagamat nakaligtas ang bata, minalas namang mahagip ng tren ang ginang na naging sanhi ng agaran nitong kamatayan.

Inaalam pa ng pulisya ang body number at kung sino ang operator ng nasabing tren na kaagad na tumakas matapos ang insidente. (Lordeth Bonilla)